Adierazpena

Euskal Selekzioak eta Palestinakoak azaroaren 15an San Mamesen jokatuko duten partida dela-eta, honako hau adierazi nahi dugu Gernika-Palestina plataformak, Gu ere Bai kirol ekimenak eta Gure Eskuk:

1. 1.  Palestinan milaka eta milaka pertsonen heriotza, beste askoren desplazamendua eta lurralde oso baten suntsiketa ekarri duen genozidioa eta bidegabekeria behin betiko amaitu behar dela diogu. Munduko herriek sarraski horren aurrean isilik ez geratzea erabaki dugu, eta beraz, behar bezainbestetan esango dugu: Genozidioa stop!
   2.  Herri libreak nahi ditugu munduan: Euskal Herri librea, Palestina librea. Herritar libreak nahi ditugu: pertsona guztien eskubide guztiak bermatzen dituen mundu bat nahi dugu. Horregatik diogu euskal herritarrek eta palestinarrek bakean eta askatasunez bizitzeko eta beren etorkizuna libre eta demokratikoki erabakitzeko eskubidea dutela.
   3. Kirola elkartasuna sustatzeko tresna izatea nahi dugu. Kirolaren berezko eta jatorrizko balioak nabarmendu nahi ditugu, topagunea delako eta bizipenak elkarrekin partekatzeko eremua. Horregatik, Euskal Selekzioaren eta Palestinaren arteko partida mundu osoari elkartasun eta bakearen alde bidalitako mezu erraldoia izatea nahi dugu.
   4. Euskal Selekzioaren ofizialtasuna aldarrikatu nahi dugu. Eta, bide horretan, azaroaren 15ekoa bezalako ekimenen garrantzia nabarmendu. Euskal Herriak, Palestinak bezala, eskubidea du bere selekzioa nazioarteko txapelketetan modu ofizialean lehiatzen ikusteko. Eta dei egiten dugu hainbat eremutan egindako urratsak futbolean eta gainerako kiroletan ere egiten ahalegintzeko.
   5. Horregatik guztiagatik, euskal herritar guztiei azaroaren 15ean Bilbora etortzeko, futbolaz gozatzeko eta “Herri libreak. Euskal Herria Palestina. Genozidioa stop!” lelopean 17:30ean Arriagatik abiatuko den elkartasun martxan parte hartzeko deia egin nahi diegu. Bilbo izan dadin genozidioaren kontrako eta herri libreen aldeko elkartasun oihu erraldoia.

Declaración en castellano | Déclaration en français |  فلسطين، إقليم الباسك، الشعوب الحرة

Sinatzaile guztien zerrenda